大鄉里出城之魚露浸雞飯：祥興

阿叔遞個十幾版紙既活頁餐牌俾我，揭開，話：

「今日得呢兩版有。」

一望，係「全日常餐」同「牛雜麵餐」。

「…無其他？」 「係呀，係得咁多咋。」

唔係又迫我食包呀…。

「…咁飯呢？」 「快餐個五個囉。」

「…無燒味？」 「散叫咪有囉。」

阿叔，我少出來食飯，都唔好咁玩我吖。

「要碗魚露浸雞飯…」 「唔係真係魚露浸雞噃…

（ 吓？ ）

「…只不過係白切雞加碟魚露俾你撈吓飯咋噃。」

碗上的「魚露浸雞飯」…唔係，係「魚露『送』雞飯」…真真不錯：先講白切雞 - 係胸都嫩滑、肉都入味、雞都唔係好肥既情況下，無乜投訴。反而真係想講吓 D 魚露：「魚露」兩碟上，一碟係平日見慣見熟既魚露（清啡色），一隻係唔知乜醬（欖綠色）；一試，「唔知乜醬」甜甜酸酸辣辣的；再試，試到有辣青椒同蒜泥…好送飯！

截住靚姐，問係乜野醬。

「吓…」靚姐一號就咁行開咗，叫咗靚姐二號來。

當然死心不息咁重複條問題。

「我都唔知噃，問吓老闆吖。」

靚姐二號就咁行開咗，叫咗…頭先個阿叔來。

相視靦腆。

阿叔開始怕咗我。

「咪係魚露醬囉！你食緊『魚露撈飯』嘛！」

我亦都怕咗阿叔。

「咁…點整架？」

「我點知啫！家家都唔同架啦！自己整架嘛！」

唉，我真大鄉里！

祥興燒臘粥粉麵茶餐廳

九龍觀塘秀茂坪商場一樓119號鋪